كلنا اولاد الدويقة!!


يجرى ايه لو تصحى مرّة
تلقى صخرة تانية وقعت..
فوق دماغك؟

أمر عادي
مااحنا عايشين من زمان..
تحت الصخور!

والصخور عايشة معانا ..
في المواسم والمآسي
حتى لما ننام بتِطـْبق عالصدور
والصخور ماشية معانا
ده احنا لما بنمشي
(بنـْدَحْرَجْ ) تماسي!

كلنا ولاد الدويقة
أيوه دي هي الحقيقة
كل واحد فوق دماغه ألف صخره
بتقتله فـْ كل دقيقة.

صخرة وقعت..
يوم غرقنا فـ ( السلام )..
صخرة هربت ياسلام !
طِلِعتْ بريئة !
صخرة لما مجلس الشورى اتحرق
صخرة واقفة بتراقبنا
واحنا واقفين في الطابور
نلتفت نلاقيها في كمين المرور!
كل لحظة بنِـتـْنِحِـر
والصخور حرة طليقة.

صخرة مـ النوع المبارك
صخرة اهِه آخر جمال
صخرة مقصدها شريف
صخرة في اللعب النظيف
صخرة هيمانه فـ سرور
صخرة سادسة مجرمة
واقفة سدّ مقَـفـّـِلة..
باب الحديد!
صخرة سابعة .. تاسعة..عاشرة....
والصخور..
راكبة حاجات فخمة ( مُعـَدَّل )
والحاجات لها شاشة ( ديجتال )

والصخور قاعدة وحواليها حجارة
واقفة تحرسها ..
وشايلالها البخور!

والصخور دايماً تخوِّفْـنا
تقول :
خشوا الجحور.

الصخور قدامنا
مش وهم وسراب
والصخور..
بتعدي فوقنا كالسحاب

كل ما نسهى نلاقي
تنحدف صخرة علينا
قوم يقولوا :
ده قدرنا..
ادعوا.. يمكن تنفرج من بعد ضيقة.!

الصخور طابقة علينا
بس آه لو.. تـِمَطـَّر
قالوا برضه ماتخافوش
الصخور قاسية صحيح
بس برضه حاسة بيكم
لما راح تنزل عليكم..
هاتلاقوها و بحنان ..
نازلة بالحركة البطيئة !

موتوا.. يا اولاد الدويقة..
موتوا .. ( بصخورنا الصديقة) !!
..
كلنا اولاد الدويقة..
هي دي عين الحقيقة .

وليد خيرت 15/9/2008